Nýjustu fréttir

Um liðna helgi var spilað á 50. Goðamótinu frá upphafi í Boganum á Akureyri. Við það tækifæri var samningur um Goðamótaröðina endurnýjaður til þriggja ára eða til ársins 2020. Mótin eru haldin fyrir yngri iðkendur í knattspyrnu karla og kvenna. Mikið líf og fjör er í Boganum á Akureyri þegar mótin eru haldin og má sjá gleðina skína af andlitum keppenda og ekki ólíklegt að stjörnur framtíðarinnar á knattspyrnusviðinu leynist í hópi þátttakenda.

Ekki verður boðið uppá vorslátrun, svokallaða páskaslátrun, í sauðfjársláturhúsum Norðlenska á Húsavík og Höfn vorið 2017. Ekki er sérstök þörf á því hráefni sem fellur til úr vorslátrun þar sem annarsvegar eru til nægar birgðir af lambakjöti og hinsvegar hafa afurðir vorslátrunar ekki verið af þeim gæðum að fyrir þær fáist ásættanlegt verð. Vorslátranir hafa því ekki staðið undir sér og við núverandi aðstæður liður í nauðsynlegri hagræðingu að fella þær niður.

Norðlenska hefur hlotið gæðavottunarstaðalinn ISO/FSSC 22000 frá vottunarstofunni SAI Global. Staðallinn er matvælaöryggisstaðall og nær vottunin yfir báðar kjötvinnslur fyrirtækisins og sláturhús Norðlenska, á Húsavík og Akureyri.