Nýjustu fréttir

Vegna útflutnings lambakjöts frá Norðlenska til Whole Foods verslanakeðjunnar í Bandaríkjunum eru gerðar mjög strangar heilbrigðis- og gæðakröfur til slátrunar og vinnslu Norðlenska á Húsavík. Á dögunum kom fulltrúi bandaríska landbúnaðarráðuneytisins til Húsavíkur til þess að gera úttekt á  sláturhúsi og vinnslu Norðlenska, en slík gæðaúttekt er árleg. Áður hafði Ólafur Oddgeirsson, dýralæknir í Skotlandi, gert samskonar úttekt fyrir hönd Whole Foods hjá Norðlenska á Húsavík. Skemmst er frá því að segja að Norðlenska stenst fyllilega allar þær kröfur sem gerðar eru vegna útflutningsins til Bandaríkjanna.

Haustslátrun hjá Norðlenska hefur það sem af er sláturtíð gengið mjög vel, lömbin flokkast vel og fallþungi er ívið meiri en í fyrra. Um mánaðamótin september-október var búið að lóga, samanlagt í sumar- og haustslátrun, 44.500 dilkum á Húsavík og 8.600 dilkum á Höfn, sem að sögn Reynis Eiríkssonar, vinnslustjóra Norðlenska, eru nokkru færri dilkar en á sama tíma í fyrra. Ástæðan er fyrst og fremst sérlega góð tíð í haust, sem hefur gert það að verkum að sumir bændur hafa viljað bíða með að koma með dilka til slátrunar vegna góðrar haustbeitar í heimahögum.

Ákveðið hefur verið að Norðlenska hætti að innheimta gjald vegna flutnings nautgripa frá innleggjendum í sláturhús. Þessi breyting tekur gildi í dag, mánudaginn 11. september. Norðlenska slátrar nautgripum tvisvar í viku og hefur flutningsgjald á grip verið kr. 2.600, en frá og með deginum í dag fellur þetta gjald niður, sem fyrr segir.