Nýjustu fréttir

Í gær var felld kýr úr Hleiðargarði í Eyjafjarðarsveit í sláturhúsi Norðlenska á Akureyri, sem ekki er í frásögur færandi nema fyrir það að skrokkurinn reyndist vera sá þyngsti sem sögur fara af hjá Norðlenska - hvorki meira né minna en 526 kg! Þegar skrokkurinn var færður á vigtina í Norðlenska í gær þurftu menn að nudda augun til þess að fullvissa sig um að talan væri rétt. En ekki var um að villast - vel yfir hálft tonn!

Í þesssari viku hefjast viðamiklar endurbætur á fjárrétt sláturhúss Norðlenska á Húsavík, sem miða að því að gera alla aðstöðu bæði starfsfólks og fjáreigenda mun betri en nú er, auk þess að spara mikla vinnu.

Haustslátrun lauk kl. 13.31 á Húsavík í dag. Heildarfjöldi sláturfjár var 80.236, samanborið við 81.769 haustið 2006.  Meðalþungi dilka var sem næst 15,2 kg, en endanleg tala liggur ekki fyrir. Sigmundur Hreiðarsson, vinnslustjóri á Húsavík, segir að slátrunin hafi gengið mjög vel og hann er þakklátur starfsfólki fyrir afar gott starf.