Nýjustu fréttir

"Mér fannst mjög áhugavert að takast á við þetta verkefni þegar leitað var til mín með að setjast í stjórn Norðlenska. Það er afar lærdómsríkt að kynnast starfi framleiðendanna og taka þátt í því að efla enn frekar sterkt fyrirtæki eins og Norðlenska er. Það er greinilega kröftugur hópur starfsmanna í Norðlenska og stjórnin virkar mjög sterk. Það eru greinilega allir samstíga um að gera gott fyrirtæki enn betra," segir Auður Finnbogadóttir, stjórnarformaður Norðlenska. 

Ný stjórn Norðlenska var kjörin á aðalfundi fyrirtækisins í gær. Aðalmenn í stjórn eru: Auður Finnbogadóttir, viðskiptafræðingur í Garðabæ, Ingvi Stefánsson, bóndi í Teigi, Geir Árdal, bóndi í Dæli, Aðalsteinn Jónsson, bóndi í Klausturseli og Heiðrún Jónsdóttir, lögfræðingur í Garðabæ.

Á aðalfundi Norðlenska í gær var staðfest uppgjör fyrir 2007, en eins og fram hefur komið var félagið rekið með 505,8 milljóna króna hagnaði samanborið við 18,7 milljóna króna hagnað árið 2006.