Nýjustu fréttir

Landssöfnunin Neyðarhjálp úr norðri, landssöfnun vegna hamfaranna í Asíu stendur nú yfir. Það er Norðlenska bæði ljúft og skylt að leggja sitt af mörkum til hjálparstarfsins og hefur gefið 100.000 krónur í söfnunina og jafnframt skorað á Sláturfélag Suðurlands að gera slíkt hið sama.

Þann 17. desember síðastliðinn útskrifuðustu tveir nemar í kjötiðn frá Hótel og Matvælaskólanum í Kópavogi þ.e. í bóklegum hluta námsins. Þetta voru þeir Pétur Karlsson og Sigmundur Arnar Jósteinsson. Pétur er á fjórða ári námssamnings og Sigmundur tekur sveinspróf vorið 2005. Sigmundur Arnar gerði sér lítið fyrir og hlaut öll þau verðlaun sem í boði voru fyrir námsárangur í kjötiðn. Besta árangur í bóklegu, besta árangur í verklegu og besta árangur á vorönn 2004. Til hamingju strákar.

Nú hefur tekist að selja allar gærur sem féllu til hjá Norðlenska í nýliðinni sláturtíð. Eins og margoft hefur komið fram hefur reynst mjög erfitt að selja gærur og eru verðin afar lág, reyndar í sögulegu lágmarki. Það er því óhjákvæmilegt að lækka verð til bænda frá fyrra ári og hefur verið ákveðið að greiða innleggjendum með viðskiptasamning við Norðlenska 55 krónur fyrir lambagærur og 52,8 þeim sem ekki hafa gert viðskiptasamning við Norðlenska. Ekkert fæst fyrir ærgærur í ár. Gærur verða afreiknaðar hjá Norðlenska á næstu dögum og verða þær greiddar út til bænda 7. febrúar 2005.