Nýjustu fréttir

Hér á bændavef Norðlenska er nú hægt að taka gögn er varða innlegg sauðfjárbænda, beint inn í Fjárvís, slóðin er http://www.nordlenska.is/index.asp?opna=medaltolur_innskra Fjárvís er forrit fyrir sauðfjárbændur, sem vilja hafa góða yfirsýn yfir fjárbúskapinn. Skýrsluhald búsins er hægt að færa beint í tölvuna af bændavefnum. Þannig er á auðveldan og þægilegan hátt hægt að skilað gögnum til Bændasamtakanna á tölvutæku formi í stað handskrifaðra fjárbóka. Þetta eykur skilvirkni og öryggi gagna, sem send eru í landsuppgjör. Ef að innleggjendur eru ekki komin með notandanafn og lykilorð inn á bændavefinn, er hægt að nálgast það á skrifstofu Norðlenska í síma 460-8800.

Norðlenska býður landsmönnum að koma og skoða starfsemi fyrirtækisins á Akureyri á fyrsta vetrardag laugardaginn 22. október. Jafnframt er öllum gestum boðið upp á að gæða sér á ekta íslenskri kjötsúpu. Börnunum verður boðið upp á kassaklifur. Opið hús Norðlenska er í samstarfi við KEA og Landsbankann. Að sögn Ingvars Más Gíslasonar, markaðsstjóra Norðlenska, stendur Markaðsráð kindakjöts annað árið í röð fyrir súpukjötsdeginum á fyrsta degi vetrar. Þann dag hefur Markaðsráð tilnefnt sem hinn Íslenska súpukjötsdag og hvetur landsmenn til að gæða sér á íslenskri kjötsúpu. Við tökum að sjálfsögðu þátt í þessu átaki og um leið ætlum við að kynna Akureyringum og nærsveitamönnum og landsmönnum öllum starfsemi okkar hér á Akureyri með opnu húsi frá kl. 13 til 16 nk. laugardag, 22. október. Þetta höfum við ekki gert áður, en við teljum fulla ástæðu til þess að gefa fólki kost á að kynna sér starfsemi okkar og sjá meðal annars hversu fullkomin og tæknivædd kjötvinnsla Norðlenska er orðin.

Sauðfjárslátrun hjá Norðlenska á Húsavík hefur gengið sérlega vel það sem af er, að sögn Sigmundar Hreiðarssonar, vinnslustjóra fyrirtækisins á Húsavík. Afköst hafa verið mjög góð í sláturtíðinni og gæði hafa aldrei verið meiri. Gallaprósenta hefur legið nálægt 1%, sem að sögn Sigmundar er ótrúlega góður árangur. Hin svokallaða haustslátrun hófst á Húsavík þann 22. ágúst sl. og síðan hefur verið slátrað alla virka daga. Að meðaltali hefur verið slátrað um 2.000 dilkum á dag, en gert hafði verið ráð fyrir að slátrað yrði um 1.950 dilkum á dag. Þann 5. október sl. var sett nýtt met hjá Norðlenska, því á Húsavík var slátrað 2.235 dilkum og þann sama dag var slátrað 1.104 dilkum á Höfn og í það heila var því 3.339 dilkum slátrað hjá Norðlenska þennan dag. Þetta hefur gengið alveg framúrskarandi vel og því þakka ég einstaklega samhentu starfsliði og góðri verkstjórn. Það leggjast hér allir á eitt um að hlutirnir gangi vel og vinnuandinn er alveg einstakur. Í sláturtíðinni eru um 85 Íslendingar starfandi hér í húsinu og um 50 erlendir starfsmenn af tíu þjóðernum frá Bretlandi, Nýja-Sjálandi, Grænlandi, Finnlandi, Svíþjóð, Hollandi, Thailandi, Slóvakíu, Póllandi og Slóveníu. Þetta samstarf fólks af ólíkum uppruna hefur gengið framúrskarandi vel. Sumir þessara starfsmanna hafa verið hér áður í sláturtíð og nú þegar höfum við fengið óskir mörgum starfsmönnum um að fá að koma hér að ári. Um síðustu helgi var efnt til hópferðar með útlendingana í nágrannasveitir m.a. Mývatnssveit og Laxárvirkjun og síðan var grillað eftir að búið var að fara í Baðlónið í Mývatnssveit. Þetta tókst í alla staði mjög vel og útlendingarnir lýstu mikilli ánægju með þetta, segir Sigmundur.