Nýjustu fréttir

Norðlenska hefur gert það að hefð um hver jól að veita styrk til félagasamtaka. Eina skilyrðið fyrir styrkveitingu er að þau séu starfrækt í bæjarfélagi þar sem Norðlenska er með starfsstöð. Í þetta sinn hefur Norðlenska ákveðið að styrkja skólaver fyrir misþroska börn. Styrkurinn er eitt hundrað þúsund krónur og var hann afhentur í gær. Að sögn Auðar Jónasdóttir forstöðumanns skólaversins, sem starfrækt er í Túni á Húsavík, ætla þau að nota peningana til að kaupa þroskaleikföng fyrir börnin.

Opinn dagur var haldinn hjá Norðlenska á Húsavík í nóvember síðastliðnum þar sem Húsvíkingum og nærsveitarmönnum var boðið í heimsókn. U.þ.b.350 manns þáðu boðið. Nú hefur verið dregið í happdrættinu og nöfn vinningshafa eru Guðrún Þórsdóttir, Már Höskuldsson og Stefanía Jóhannesdóttir. Við óskum þeim til hamingju og gleðilegra jóla með gæðakjöti frá Norðlenska.

Í ljósi frétta fyrir helgi um hræringar á kjötmarkaði skal það áréttað að KEA, eitt og sér, hefur ekki áform um að selja eignarhlut sinn í Norðlenska matborðinu ehf. enda er KEA aðili að hluthafasamkomulagi við Búsæld ehf. (félag innleggjenda hjá Norðlenska) og það samkomulag gerir m.a. ráð fyrir tiltekinni umgjörð um eignarhald og þróun á eignarhaldi þessara tveggja stærstu hluthafa Norðlenska matborðsins ehf.