Nýjustu fréttir

Góð stemning var í matsal Norðlenska á Húsavík í dag. Maturinn rennur ætíð ljúflega niður á þeim bænum en óhætt er að fullyrða að fólk hafði það óvenju notalegt í dag. Þá mætti nefnilega trúbadorinn, veiðimaðurinn, kokkurinn og myndlistarmaðurinn Frímann Sveinsson á staðinn, tók lagið og skemmti fólki.

Ástríður Baldursdóttir ráðskona Norðlenska á Höfn bauð upp á glæsilega tertu með kaffinu í gærdag. Ástæða þessa fallega og bragðgóða viðgjörnings var skrifað á tertuna þannig að ekkert færi á milli mála. Þar stóð skrautritað með súkkulaði: „Nú er þetta hálfnað lömbin mín. Kveðja, Ásta.“

„Þeir eru allt frá unglingum í ævintýraleit upp í þaulvana slátrara á sextugsaldri og setur litríkur hópurinn svip sinn á bæinn,“ sagði í frétt á Stöð 2 í kvöld þar sem fjallað var um sláturtíðina hjá Norðlenska á Húsavík. Fram kom að farandverkamenn streymdu hvaðanæva að til bæjarins. Rætt var Sigmund Hreiðarsson vinnslustjóra.