Nýjustu fréttir

Þann 19. ágúst síðastliðinn hélt Norðlenska sumargrill fyrir starfsfólk fyrirtækisins og fjölskyldur þeirra. Vel var mætt og skemmti fólk sér konunglega í blíðunni á Akureyri. Farið var í leiki með börnin og klifrað á kössum með aðstoð hjálparsveitanna Súlna. Bautinn sá svo um að grilla Goða pylsur fyrir krakkana og gæðakjöt að hætti Norðlenska, fyrir mannskapinn.

Norðlenska hefur gefið út nýtt fréttabréf og mun því verða dreift um allt starfssvæði Norðlenska. Einnig má finna fréttabréfið hér á heimasíðunni á slóðinni http://www.nordlenska.is/index.php?opna=sida&id=550&uid=462,550. Í blaðinu er m.a. að finna upplýsingar um verð og álagsgreiðslur til bænda, sem og aðrar gagnlegar upplýsingar varðandi sláturtíð.

Norðlenska hefur hækkað verðskrá fyrir sauðfjárafurðir enn frekar. Verðskrána má sjá á heimasíðu Norðlenska http://www.nordlenska.is/?opna=baendur. Þá hefur verið ákveðið að þeir sem eru með viðskiptasamninga við Norðlenska fá greitt 1,2% álag á kjötinnlegg sitt í komandi sláturtíð. Þetta álag verður greitt í desember. Frá verðskrá, sem Norðlenska gaf út í fréttabréfi í júní sl., hefur orðið sú breyting að verð fyrir kg af DR3 hefur hækkað um fimm krónur - úr 303 í 308 krónur - og í töflu yfir álagsgreiðslur í sláturtíð kemur fram að álagsgreiðsla hefur hækkað úr 7% í 9% í vikunni 29. ágúst til 2. september og úr 2 í 5% í vikunni 5. til 9. september. Verðskráin gildir bæði fyrir framleiðendur í Búsæld og einnig þá sem eru utan Búsældar. Nánar er hægt að skoða fleira sem tengist sláturtíð í nýjasta fréttabréfi Norðlenska á heimasíðunni, slóðin er http://www.nordlenska.is/?opna=sida&id=550&uid=462,550