Norðlenska með í verkefninu Geðveik jól
Norðlenska tekur þátt í verkefninu Geðveik jól ásamt átta öðrum „geðveikum” fyrirtækjum. Verkefnið, Geiðveik jól, á að minna á mikilvægi geðheilsu á vinnustöðum og er tónlist notuð til að skapa jákvæða stemmingu og í leiðinni styrkja fyrirtækin gott málefni.
„Starfsmannafélag Norðlenska leiðir verkefnið fyrir okkar hönd og saminn hefur verið texti við lagið The Story sem þýddur er á íslensku Með þér,” segir Ingvar Már Gíslason, markaðsstjóri Norðlenska. Upptökur í tengslum við verkefnið fóru fram á Húsavík á miðvikudag í síðustu viku og á Akureyri daginn eftir. Um miðjan föstudaginn kom svo hluti starfsmanna saman ásamt fjölskyldum við kirkjutröppurnar þar sem tekið var upp myndband við lagið.
Geðveik jól er söfnunarverkefni þar sem almenningur og fyrirtæki geta lagt fram áheit á „geðveikasta” jólalagið 2014. „Norðlenska hefur valið að þau áheit sem við söfnum renni til Setursins á Húsavík og Lautarinnar á Akureyri. Þættirnir um Geðveik jól 2014 verða síðan sýndir á RÚV í desember þar sem fyrirtækin átta keppa um hylli dómnefndar og almennings. Við ætlum að sjálfsögðu að vinna!" segir Ingvar.
