Jónas kjötiðnaðarnemi ársins
Jónas Þórólfsson, nemi í kjötiðn hjá Norðlenska tók þátt í nemakeppni Félags íslenskra kjötiðnaðarmanna (FÍK) sem haldin var dagana 7. - 8. mars. Jónas stóð sig með miklum ágætum í keppninni og var sér og Norðlenska til sóma. Hann var valinn kjötiðnaðarnemi ársins og fékk viðurkenningu fyrir bestu nýjungina að auki. „Það var skreyting sem ég gerði á fillet. Notaði dúkaefni sem stensil, stráði paprikudufti yfir og bjó þannig til kryddblóm á fituna.”
Jónas kveðst að sjálfsögðu mjög ánægður með sigurinn og heiðurinn. „Þeir sem fara í svona keppni reyna að standa sig eins vel og þeir mögulega geta.” Spurður hvort hann hafi stefnt á sigur í nemakeppninni jánkar Jónas því. „Allir sem taka þátt í svona keppni hljóta að fara með það í hug að vinna.”
