Gangnagerð í Skíðadal
Gífurlegt fannfergi er víða á Norðurlandi og hefur verið allar götur síðan í október. Hvorki var að sjá í Skíðadal í Eyjafirði né í Fljótum í gær að komið væri fram í maí og sömu sögu er að segja úr sveitunum austan Akureyrar; allt á kafi í snjó og ekki hægt að setja lömb út úr húsi. Svona var upphaf umfjöllunar í Morgunblaðinu í dag um ástandið hjá norðlenskum bændum.
Í Morgunblaðinu sagði að bændur í Skíðadal í Eyjafirði hefðu ekki farið varhluta af snjó. „Þar eru allar skepnur á húsi sem annars staðar og ljóst að hefðbundin vorverk eins og girðingavinna eru ekki á næstu grösum. Óskar bóndi Gunnarsson á Dæli sýndi Morgunblaðinu í gær hvernig umhorfs er við sumarhús sem hann á á næstu jörð,“sagði undir meðfylgjandi mynd í blaðinu af formanni Búsældar.
